कोलकता : पश्चिम बंगालमधील बीरभूम जिल्ह्यातील एका हॉटेलमध्ये आग लागली. यात सात जणांचा मृत्यू झाला असून अनेक जण गंभीर जखमी झाले आहेत. एसी युनिटमधील शॉर्ट सर्किटमुळे आग लागल्याचा अंदाज आहे. मिळालेल्या माहितीनुसार, श्रावण सोमवारच्या उत्सवासाठी मोठ्या संख्येने भाविकांनी तारापीठ मंदिराला भेट दिली होती. ते तेथील एका हॉटेलमध्ये थांबले होते. पहाटे साडे चारच्या सुमारास ते झोपलेले असताना आग लागली. अग्निशमन दलाला घटनेची माहिती मिळताच आग नियंत्रणात आणण्यात आली. हॉटेलमध्ये अडकलेल्या भाविकांना बाहेर काढले जात आहे. जखमींना रामपूरहाट शासकीय वैद्यकीय महाविद्यालय आणि रुग्णालयात दाखल करण्यात आले आहे. या दुर्घटनेतून बचावलेल्या कोलकाता येथील एका महिलेने सांगितले, अचानक संपूर्ण हॉटेल धुराने भरले. आम्हाला श्वास घेता येत नव्हता आणि बाहेर पडण्याचा मार्ग शोधणे कठीण झाले होते.

दोषपूर्ण एसी वायरिंगमुळे आगीचा धोका

एसीमधील शॉर्ट सर्किटमुळे विजेच्या प्रवाहात अचानक वाढ होऊ शकते. यामुळे एसी वायरिंगमधील इन्सुलेशन गरम होऊन जळू शकते, ज्यामुळे तारा एकमेकांच्या संपर्कात येतात. या प्रक्रियेदरम्यान ठिणग्या पडून आग लागू शकते.

तारापीठ मंदिर हे देवी ताराला समर्पित 

तारापीठ मंदिर हे पश्चिम बंगालच्या बीरभूम जिल्ह्यात असलेले, देवी ताराला समर्पित एक प्रसिद्ध मंदिर आहे. येथे मोठ्या संख्येने भाविक येतात. येथील मूर्तीमध्ये भगवान शिव देवी ताराच्या मांडीवर बसलेले दाखवले आहेत. दिवसा सोन्याचा मुखवटा घातला जातो, पण रात्री तो काढला जातो. मंदिराजवळ तारापीठ महास्मशान आहे, जे तांत्रिक साधनेचे एक ठिकाण आहे. तारापीठ हे देवी ताराचे प्रसिद्ध तांत्रिक साधक आणि भक्त, बामखेपा यांच्याशी देखील संबंधित आहे. त्यांची समाधी आणि स्मारक मंदिर देखील येथेच आहे.